Mae Cyfrif Dysgu Personol Ally wedi rhoi hwb i’w busnes.
Busnes sefydledig
Mae Ally Campbell, 42 oed, hyfforddwr beicio mynydd profiadol a sefydlodd ei busnes ei hun, Campbell Coaching, yn cynnig sgiliau beicio, hyfforddi, arwain a rheoli llwybrau yng Nghwm Afan, De Cymru.
Fel yr unig fenyw sy'n cynnig cyrsiau rheoli llwybrau beicio mynydd achrededig yng Nghymru a Lloegr ar hyn o bryd, roedd Ally yn chwilio am ffyrdd o ddal ati i adeiladu ei busnes.
Meddai Ally: "Mae gen i lawer o brofiadau yn y diwydiant ac ym myd hyfforddi, ond dwi wastad wedi bod â diddordeb i ddysgu mwy am ochr fecanyddol fy ngwaith. Fel hyfforddwr, rydych chi'n gobeithio y bydd pobl yn cyrraedd gyda'u beiciau mewn cyflwr da, ond os nad yw rhywbeth yn hollol iawn am unrhyw reswm, dwi eisiau allu trwsio’r broblem a chynghori fy nghleientiaid ar beth i'w wneud."
Ehangu ei busnes drwy hyfforddiant
Penderfynodd Ally gwblhau ei rhaglen Cynnal a Chadw Beiciau Proffesiynol Lefel 2 gyda rhaglen Cyfrif Dysgu Personol Llywodraeth Cymru, er mwyn datblygu ei dealltwriaeth ei hun o'r beiciau y mae'n gweithio gyda nhw o ddydd i ddydd, ac er mwyn gwella'r gwasanaeth mae hi'n ei ddarparu i'w chleientiaid.
Meddai: "Yn ychwanegol i adeiladu fy ardal hyfforddi sgiliau fy hun gyda nodweddion amrywiol i helpu ddatblygu sgiliau beicio mynydd fy ngleientiaid, penderfynais gwblhau cwrs drwy Gyfrif Dysgu Personol.
“Roedd y cwrs yn anhygoel, ac bydd wybodaeth dwi wedi dysgu yn fuddiol iawn i'm busnes. Dwi’n barod yn cynnig hyfforddi a sgiliau llwybrau beicio mynydd, ond nawr dwi’n gallu cynnig gweithdai cynnal a chadw hefyd. Mae Cyfrif Dysgu Personol wedi agor fy musnes i gyfleoedd newydd a’r gallu i gynnig gwasanaeth mwy cynhwysfawr i fy nghleientiaid.
"Ar ôl treulio cymaint o amser ym myd y beic, rydych chi'n dod i adnabod eich ffordd o gwmpas. Ond mae cwblhau'r cwrs hwn drwy Gyfrif Dysgu Personol wedi fy helpu i uwchsgilio a dwi nawr yn gallu archwilio beiciau'n iawn, gan wybod fy mod i bellach wedi cymhwyso'n ffurfiol i wneud hynny."
Mynediad at ddatblygiad sgiliau
Fel rhan o'r busnes, mae Ally yn darparu hyfforddiant sy'n benodol i fenywod er mwyn helpu i annog menywod eraill i gael mynediad at ddatblygiad sgiliau proffesiynol yn ei diwydiant.
Meddai Ally: "Mae beicio mynydd yn aml yn cael ei weld fel camp i ddynion yn bennaf. Dwi wedi bod yn hyfforddi yn y diwydiant ers 18 o flynyddoedd, ac o gymharu’r sefyllfa heddiw â phan ddechreuais i, mae yna gymaint mwy o ferched yn beicio ar bob lefel bellach. Mae llawer i’w wneud o hyd ond dwi’n falch o allu cynnig amgylchedd hamddenol i helpu menywod i gael mynediad at hyfforddiant a hogi eu sgiliau."
Mae mor bwysig cael mynediad at y gwasanaethau sydd ar gael i ni a pharhau i ddatblygu ein galluoedd proffesiynol trwy gydol ein gyrfaoedd. Mae Cyfrif Dysgu Personol yn ffordd wych o wneud hynny, a byddwn yn annog unrhyw un sydd eisiau datblygu ac ehangu eu sgiliau i ystyried y peth."
Chwiliwch Gyfrifon Dysgu Personol i ddarganfod mwy, neu cysylltwch â Cymru'n Gweithio.
