Stori Dylan's

Manon Stonehewer, Rheolwr llawr

Dechreuodd Manon weithio’n rhan amser ym mwyty Dylan’s fel gweinyddes pan oedd hi’n 17 oed, gan ddychwelyd i weithio yn y bwyty bob haf yn ystod ei chyfnod yn y brifysgol cyn ymgymryd â rôl reoli ar ôl graddio mewn Hanes. Mae hi bellach ar fin mynd i deithio a defnyddio ei phrofiad i weithio dramor.

“Os ydych chi’n gallu gweithio’n llwyddiannus mewn bwyty prysur, ac os ydych chi eisiau teithio neu weithio yn rhywle arall, mae gennych chi sgiliau y byddwch chi’n gallu mynd â nhw efo chi a bydd yn ddeniadol i gyflogwyr.

“Ers pan o’n i’n 14 oed, mae’r holl swyddi dw i wedi’u cael wedi bod ym maes lletygarwch a thwristiaeth. Heb y cyfleoedd yna, dw i ddim yn gwybod lle fyswn i.

“Dw i bellach yn gobeithio teithio’r byd a defnyddio fy mhrofiad lletygarwch i gael swyddi wrth i fi deithio drwy wledydd fel Portiwgal a Sbaen.

“Dw i ddim yn meddwl bod gennych chi ddim byd i’w golli o gael swydd fel fy un i, ac mae’n rhywbeth y gallwch chi ddod ’nôl ato dro ar ôl tro.

“Wnes i ddechrau yma pan o’n i’n 17 oed, es i i’r brifysgol, dod yn ôl yma i weithio yn ystod y gwyliau a gwneud hynny am dair blynedd. Ar ddiwedd fy ngradd, mi ges i’r cyfle i ddatblygu i fod yn rheolwr, a mwynheais i hynny’n fawr.”

Jason Axford, Prif gogydd y grŵp

Ymunodd Jason â’r bwyty ym Mhorthaethwy pan agorodd naw mlynedd yn ôl, cyn gweithio ei ffordd drwy rengoedd y gegin i fod yn brif gogydd tri safle Dylan’s yn y gogledd.

“Dw i’n caru ac yn mwynhau mynegi fy hunan ar blât o fwyd gwych a gwneud yn siŵr bod pobl sy’n eistedd yn y bwyty yn ei fwynhau. Dyna dw i’n angerddol amdano fo yn fy swydd, a dyna dw i’n ei fwynhau fwyaf.

“Dim llawer o bobl sy’n gwybod pa mor ddiddorol gall plât o fwyd fod, ac mae ’na rywbeth arbennig am roi rhywbeth at ei gilydd. Mae gweithio gyda chynnyrch lleol yn wych hefyd.

Un o fanteision gweithio yn y diwydiant yma yw gallu mwynhau gyda phobl wrth weithio. Dw i’n teimlo bod yr agwedd yna ar goll o lawer o swyddi, yn enwedig mewn swyddfa neu rywbeth felly.

“Yn fan hyn, rydych chi’n mwynhau ac yn gallu cael hwyl hefyd. Dydyn ni ddim yn cymryd popeth o ddifri.”

Kyle Neil, Gweithiwr bar

Ymunodd Kyle â bwyty Dylan’s ym mis Mawrth 2020, ychydig cyn i fusnesau ledled y wlad gael eu gorfodi i gau oherwydd cyfnod clo cyntaf y coronafeirws, ond cafodd ei gadw fel aelod o staff ac mae’n dweud ei fod wedi ffynnu yn ei swydd ers i’r cyfyngiadau gael eu llacio a’r bwyty allu ailagor.

“Cyn i fi ymuno, ro’n i’n teimlo ychydig yn isel, ond unwaith wnes i ddechrau’r swydd yma mi welon nhw lawer o botensial yndda’i. Bob dydd, bob mis, dw i’n gweld fy hunan yn datblygu fwy fel unigolyn, ac yn datblygu fwy a mwy o fy sgiliau.

“Pwy a ŵyr ble allwn i gyrraedd – gallwn i godi’n uwch yn fan hyn, neu symud i rywle arall. Beth bynnag fydd yn digwydd, bydda i bob amser yn diolch i’r lle yma.

“Ro’n i’n arfer bod yn berson pryderus a nerfus iawn, doedd gen i ddim hyder – ond oherwydd y diwydiant yma dw i wedi magu hyder ac wedi blodeuo.

Mae’r diwydiant yma wedi fy helpu i ffynnu a bydd yn helpu pobl eraill i dyfu’n fersiynau gwell o’u hunain am flynyddoedd i ddod.”

Paige Mabbs, Rheolwr Adnoddau Dynol

Dechreuodd Paige weithio fel gweinyddes ym mwyty Dylan’s cyn dod yn un o’i reolwyr, ac erbyn hyn mae hi’n gweithio mewn swydd uwch yn y swyddfa. Mae hi’n diolch i’r nifer fawr o gyfleoedd mae hi wedi’u cael mewn busnesau lletygarwch i ddatblygu am lwybr ei gyrfa.

“Dw i wrth fy modd yn helpu i greu swyddi, gan sicrhau bod pobl yn datblygu’n gyflym, a’u bod nhw’n cael yr hyfforddiant cywir sydd ei angen arnyn nhw er mwyn llwyddo.

“Mae gymaint o le i ddatblygu, a does dim rhaid i chi ddod yn rheolwr ar fwyty – gallwch fod â swydd amlbwrpas. Gallwch weithio yn y gegin, neu wneud swyddi gweinyddol, neu weithio ar yr ochr adwerthu.

“Mae’n ymwneud â’r hyn rydych chi ei eisiau a pha fath o ddyfodol rydych chi’n ei weld i chi’ch hunan.

Hyd yn oed os nad ydych chi’n siŵr i ba gyfeiriad rydych chi eisiau mynd, mae’r diwydiant yn sicr yn lle perffaith i ddechrau gan fod cymaint o le i ddatblygu eich gwybodaeth a chymaint i’w ddysgu.”