Gyda chymorth ei chynghorydd gyrfa, daeth Angela o hyd i swydd newydd a roddodd ei hyder yn ôl iddi.
Bu Angela, sy’n 55 oed ac o Gaerdydd, wedi gweithio yn yr un rôl am 16 mlynedd.
Oherwydd newidiadau yn ei gweithle, daeth yn anhapus yn ei rôl i’r pwynt lle’r oedd hi “ddim yn edrych ymlaen at fynd i mewn”. Dechreuodd ei llesiant emosiynol ddioddef.
Cysylltodd Angela â Cymru’n Gweithio i ofyn am gymorth. Trefnodd apwyntiad gyda Linda Thomas, cynghorydd gyrfa yng Nghaerdydd.
Dod o hyd i’r cam nesaf
Ar ôl bod yn yr un swydd am gyhyd, nid oedd Angela yn hyderus y gallai wneud unrhyw beth arall. Bu Angela a Linda yn archwilio gwahanol syniadau o ran swyddi gyda’i gilydd. Fe wnaethon nhw drafod pa sgiliau trosglwyddadwy y gallai Angela eu defnyddio mewn rôl newydd.
Anfonodd Linda fanylion swydd at Angela yr oedd hi’n meddwl y byddai’n addas iddi. Er ei bod hi’n ansicr ar y dechrau, penderfynodd Angela roi cynnig arni.
Dywedodd: “Helpodd Linda fi i lenwi’r ffurflen gais. Roedd hi mor galonogol, ac rydyn ni wedi gwneud popeth gyda’n gilydd gam wrth gam. Roedd hi’n hollol anhygoel. Fyddwn i ddim wedi gallu ei wneud hebddi hi.”
Aeth Angela drwy ffug-gyfweliad gyda Linda i’w helpu i baratoi a thawelu ei nerfau.
“Atebodd Linda fy holl gwestiynau. Pob ‘beth os’.’Cadwodd mewn cysylltiad o’r cychwyn cyntaf ac roedd hi yno bob amser. Fedra i ddim ei chanmol hi ddigon.”
Aeth Angela am y cyfweliad a chael y swydd gyda Chyngor Caerdydd fel ‘Hyfforddwr Teithio Annibynnol’, a dechreuodd yn y swydd ym mis Mawrth 2025.
Dechrau newydd gyda hyder newydd
Mae Angela nawr yn gweithio gydag oedolion ifanc ag anghenion dysgu ychwanegol. Mae hi’n eu hyfforddi i deithio’n annibynnol i’r ysgol neu’r coleg gan ddefnyddio trafnidiaeth gyhoeddus.
Dywedodd: “Mae’n ffantastig. Rwy’n hapus iawn. Mae’n rhoi llawer o foddhad pan welwch chi’r gwahaniaeth rydych chi’n ei wneud.
“Rwy’n teimlo fel y gallaf wneud unrhyw beth nawr. Ers i mi ddechrau yn y swydd hon, rydw i hefyd wedi bod ar gyrsiau newydd ac rwy’n dysgu pethau eraill ac yn ehangu fy addysg. Rwy’n hyderus ac yn teimlo’n well amdanaf fy hun.”
Cyngor i bobl eraill
Mae Angela bellach yn annog ei ffrindiau i geisio cymorth os ydyn nhw’n teimlo’n sownd: “Os gallaf i wneud hyn, gallwch chithau ei wneud. Mae’n rhaid i chi fod yn ddewr a chymryd y cam hwnnw.
“Fy nghyngor i? Ewch i Cymru’n Gweithio. Mae ganddyn nhw staff anhygoel. A pheidiwch â dal yn ôl os ydych chi’n teimlo’n anhapus gyda lle’r ydych chi. Dim ond chi a all newid pethau. Mae’n naid fawr ond mae mor werth chweil.”
Os ydych chi wedi cael eich ysbrydoli gan stori Angela, gallwch drefnu adolygiad gyrfa am ddim i’ch helpu i newid gyrfa.
