Stori Gracie

Ehangodd cymorth gyrfaoedd orwelion Gracie a’i helpu i benderfynu ar ei chamau nesaf.

Doedd Gracie ddim yn siŵr beth i’w wneud ar ôl ei harholiadau TGAU. Roedd ei ffrindiau’n mynd i’r coleg neu’r chweched dosbarth, ac roedd angen iddi benderfynu beth oedd yn iawn iddi.

Dewisodd aros yn yr ysgol oherwydd bod ganddi berthynas dda â’i hathrawon a gallai astudio pynciau yr oedd hi’n eu mwynhau.

“Doedd gen i ddim syniad beth roeddwn i eisiau ei wneud,” meddai Gracie. “Ond doeddwn i ddim eisiau difaru wrth wneud dim byd. Penderfynais ddewis pynciau roeddwn i’n teimlo y byddwn i’n eu mwynhau, ond roeddwn i’n dal i deimlo ar goll i raddau.”

Ceisio cymorth

Dyna pryd y clywodd am Ariane, cynghorydd gyrfa yn yr ysgol. Gwnaeth Gracie apwyntiad a theimlodd ei fod yn ddefnyddiol iawn. “Roedd hi mor, mor hyfryd. Gwnaeth i mi deimlo mor gyfforddus,” meddai Gracie.

Gofynnodd Ariane iddi am ei phynciau a gallai weld pa rai oedd o’r diddordeb mwyaf iddi. Gwnaethon nhw siarad am wahanol lwybrau ac opsiynau gyrfa nad oedd Gracie wedi’u hystyried o’r blaen.

“Agorodd fy llygaid lawer mwy a helpodd fi i sylweddoli bod mwy nag un opsiwn, sef mynd i’r brifysgol, ar gael ar ôl gwneud eich Safon Uwch,” eglurodd Gracie.

Dangosodd Ariane wefan Gyrfa Cymru iddi, lle gwnaeth Gracie y Cwis Paru Gyrfa, ac awgrymodd hyn y gallai hi fwynhau gweithio ym maes rheoli. Gyda’i gilydd, fe wnaethon nhw edrych ar wahanol swyddi a sut i weithio at gael mynediad iddynt. 

Darganfod cyfeiriad newydd

Aeth Gracie i ychydig o ddigwyddiadau gyrfaoedd ac, yn un ohonynt, dysgodd fwy am brentisiaeth rheoli busnes gydag Airbus. “Siaradais ag Ariane ar ôl y digwyddiad, a helpodd hi fi i sylweddoli mai busnes yw’r math o sector yr hoffwn fynd iddo,” meddai.

“Fe wnes i gais am y brentisiaeth ond fe wnes i gais i’r brifysgol hefyd fel dewis wrth gefn. Roedd y broses gyfweld yn anodd. Wnes i ddod allan ohono gan feddwl nad oeddwn i wedi’i gael," meddai hi. Ond fis yn ddiweddarach, cafodd alwad ffôn yn dweud ei bod wedi cael ei derbyn. “Cefais fy synnu cymaint,” meddai Gracie. “Roeddwn i’n gwybod pa mor gystadleuol oedd hi a doeddwn i ddim yn credu’n llwyr y gallwn i ei wneud. Ond roeddwn i wrth fy modd!”

Yn rhannu ei phrofiadau

Mae Gracie nawr yn dweud wrth ei ffrindiau pa mor ddefnyddiol oedd siarad â chynghorydd gyrfa. “Mae mor dda cael siarad â rhywun sydd â gwybodaeth mor eang am opsiynau ar ôl addysg a chymaint o lwybrau gwahanol ac a all eich arwain.”

Diolch i gefnogaeth Ariane, daeth Gracie o hyd i lwybr a oedd yn teimlo’n iawn iddi, ac mae hi’n gyffrous am yr hyn sydd o’i blaen.

Archwilio