Stori Abigail

Mae Abigail wedi magu hyder wrth gael cymorth ac wedi cynllunio ei chamau nesaf i’r brifysgol.

Mae Abigail, 17 oed, yn astudio bioleg, cemeg, mathemateg a Bagloriaeth Cymru ar hyn o bryd. Mae hi’n gobeithio cymryd y cam nesaf yn ei haddysg drwy astudio bioleg ym mhrifysgol Rhydychen. Gyda diwrnod y canlyniadau’n agosáu, mae hi’n ceisio canolbwyntio a pheidio â gadael i nerfau gymryd drosodd.

Diddordeb cynnar

“Rwy’n gobeithio astudio bioleg yn y brifysgol. Ar ôl ymweld ar ddiwrnod agored, mae wedi bod yn rhywbeth rydw i wedi bod yn gyffrous amdano.” esboniodd Abigail.

Gwnaeth tyfu i fyny ar fferm sbarduno diddordeb Abigail yn y byd naturiol o oedran cynnar. Ynghyd â’r hyn y mae hi wedi’i ddysgu yn yr ysgol, mae’r profiadau hynny wedi helpu i lunio ei huchelgeisiau ar gyfer y dyfodol.

“Mae byw ar y fferm wedi golygu bod fy mywyd cyfan wedi’i lunio o gwmpas bioleg a’r byd naturiol. Mae’r ysgol wedi cryfhau fy niddordeb ac wedi gwneud i mi eisiau mynd gam ymhellach.”

Ystyried opsiynau

Er y gall gwneud cais i brifysgol fel Rhydychen deimlo’n frawychus, mae Abigail yn dweud bod ei phenderfyniad wedi dod o’r awydd i gadw ei hopsiynau ar agor. “Doeddwn i ddim yn hollol siŵr beth roeddwn i eisiau ei wneud yn y tymor hir. Roedd prifysgol yn teimlo fel yr opsiwn cywir i ddysgu sgiliau newydd heb ymrwymo i un yrfa yn benodol.”

Drwy gydol ei thaith, mae Abigail wedi archwilio amrywiaeth o gyfleoedd i’w helpu i wneud penderfyniadau gwybodus am ei dyfodol.

“Dysgais am wahanol opsiynau, gan gynnwys prentisiaethau a phrifysgol. Helpodd hyn fi i ddeall beth allai fod yn iawn i mi.”

Magu hyder a chael phrofiad

Gyda chefnogaeth gan ei hysgol a’i theulu, mae Abigail wedi gallu magu hyder a chael phrofiad.

“Mae fy ysgol wedi bod yn gymorth mawr. Maen nhw wedi fy helpu gyda fy natganiad personol ac wedi fy mharatoi ar gyfer cyfweliadau.

“Rydw i hefyd wedi cael cyfleoedd i ymweld â phrifysgolion a chymryd rhan mewn prosiectau. Mae hyn wedi magu fy hyder.”

Y tu allan i’r ystafell ddosbarth, mae Abigail hefyd wedi datblygu sgiliau trosglwyddadwy gwerthfawr. Mae hi wedi bod yn rhan o’i Chlwb Ffermwyr Ifanc lleol, sydd wedi helpu ei pharatoi ar gyfer y dyfodol.

“Mae bod yn rhan o’r Ffermwyr Ifanc wedi fy helpu i ddatblygu sgiliau fel siarad cyhoeddus, gweithio mewn tîm a hyder. Bydd hyn o gymorth mawr yn y brifysgol.”

Edrych tua’r dyfodol

Gan feddwl am ei dyfodol, mae Abigail yn gyffrous am barhau â’i hastudiaethau. Mae hi hefyd yn edrych ymlaen at y profiad ehangach y gall prifysgol ei gynnig.

“Rwy’n gyffrous i wella fy nealltwriaeth o fioleg, ond hefyd i gwrdd â phobl newydd. Rwyf am ymuno â chymdeithasau a phrofi rhywbeth newydd.”

Ar yr un pryd, mae hi’n cyfaddef bod cymryd cam mor fawr yn dod â’i heriau ei hun.

“Rydw i ychydig yn nerfus am symud i ffwrdd o gartref, yn enwedig gan ei fod yn eithaf pell, ond rydw i hefyd yn gyffrous iawn.”

Mae Abigail yn awyddus i atgoffa eraill nid un llwybr yn unig sydd i lwyddiant.

“Peidiwch â bod o dan bwysau. Byddwch yn falch o’r gwaith caled rydych chi wedi’i wneud. Os na chewch y canlyniadau yr oeddech yn gobeithio amdanynt, cofiwch fod opsiynau eraill ar gael.”

“Gweithiwch yn galed ac arhoswch yn benderfynol. Manteisiwch ar bob cyfle sy’n dod i chi, boed hynny’n academaidd neu’n rhywbeth gwahanol.”

Fel Abigail, does dim angen i chi gynllunio’ch dyfodol cyfan i gymryd eich cam nesaf.

Os ydych chi’n ansicr ynglŷn â’ch cam nesaf, peidiwch â phoeni – rydyn ni yma i helpu. P’un a ydych chi’n ystyried mynd i brifysgol, ymgymryd â phrentisiaeth neu hyfforddiant, neu ddod o hyd i gyflogaeth, gallwn ni eich helpu i edrych ar opsiynau ac i ddeall beth sy’n dod nesaf.

Cysylltwch heddiw am gyngor a chymorth am ddim wedi’u teilwra i chi.

Archwilio